Skeireins leaf 4
- Skeireins 4:1
-
Lat5750
«So nu faheþs meina usfullnoda. jains skal wahsjan, iþ ik minznan.»
- Skeireins 4:2
-
Lat5750
eiþan nu siponjam seinaim, þaim bi swiknein du Judaium sokjandam jah qiþandam sis: «rabbei, saei was miþ þus hindar Jaurdanau, þammei þu weitwodides, sai sa daupeiþ, jah allai gaggand du imma» — nauh unkunnandans þo bi nasjand; inuh þis laiseiþ ins qiþands: «jains skal wahsjan, iþ ik minznan.»
- Skeireins 4:3
-
Lat5750
aþþan so bi ina garehsns du leitilamma mela raihtis bruks was jah fauramanwjandei saiwalos þize daupidane fralailot aiwaggeljons mereinai: iþ fraujins laiseins anastodjandei af Iudaia jah and allana midjungard gaþaih, and hvarjano þeihandei und hita nu, jah aukandei, all manne du gudis kunþja tiuhandei.
- Skeireins 4:4
-
Lat5750
inuh þis jah skeirs wisandei.
- Skeireins 4:5
-
Lat5750
mikilduþ fraujins wulþaus kannida qiþands: «sa iupaþro qimands ufaro allaim ist».
- Skeireins 4:6
-
Lat5750
ni þatei ufaro wisandan sware kannidedi, ak jah swalauda is mikilduþais maht insok jah himinakundana jah iupaþro qumanana qiþands, iþ sik airþakundana jah us airþai rodjandan, in þizei wistai manna was: jaþþe weihs jaþþe praufetus wisands jag~garaihtein weitwodjands, akei us airþai was jah us waurdahai wistai rodjands.
- Skeireins 4:7
-
Lat5750
iþ sa us himina qumana, jabai in leika wisan þuhta, akei ufaro allaim ist, «jah þatei gasahv jag~gahausida þata weitwodeiþ, jah þo weitwodida is ni ainshun nimiþ».
- Skeireins 4:8
-
Lat5750
jah þauhjabai us himina an<a> airþai in manne garehsnais qam, akei ni þe haldis airþeins was nih us <air>þai rodjands, ak himinakunda anafilhands fulhsnja þoei gasahv jag~gahausida at attin.
- Skeireins 4:9
-
Lat5750
þo nu insakana wesun fram Iohanne ni in þis þatainei, ei fraujins mikilein gakannidedi, ak du gatarhjan jah gasakan þo afgudon haifst Sabailliaus jah Markaill[i]aus, þaiei ainana anananþidedun qiþan attan jah sunu.
- Skeireins 4:10
-
Lat5750
iþ anþar s<a> weiha ....
previous | next | xml